Čehodla so Łužica optimalnje hodźi
Łužica je nimoměry derje dokumentowana: Dźesaćitysacy točenjow, stotysacy měrjenskich dypkow a digitalizowane podzemske daty z wjacorych lětdźesatkow skića detailěrowany wobraz granodiorita. Daty pokazuja: Kamjenizna je homogena, stabilna a jenož snadnje tektonisce mylena. Hlinojte krywne woršty wobmjezuja dnownu wodu, a rědko wobsydleny region postara so wo wosebje měrne wuměnjenja w podspódku.
Pruwowanje stejnišća: wědomostnje fundowane a jasnje strukturowane
We Łužicy wotměwa so tuchwilu wobšěrne pruwowanje stejnišća po jasnje strukturowanym, wědomostnym planje. Přepytowanja k preciznemu postajenju stejnišća koncentruja so na wokrjes Budyšin w regionje mjez Budyšinom, Kamjencom a Wojerecami. Dalše hłubokotočenja, seismiske měrjenske programy, geotechniske analyzy a modelěrowanja podspódka so přez tunlowe studije a studije wuwjedźomnosće wudospołnja. Z tym stwori so zakład, zo móže so Łužica europskemu rozsudej nastupajo stejnišćo za transparentnymi a přirunajomnymi wědomostnymi a hospodarskimi kriterijemi stajić.
Inowacija a hightech
Sakska je sylne hightechowe stejnišćo z mjezynarodnje widźomnymi clusterami, wosebje w mikroelektronice a połwodźakach. Wukonliwe industrijowe a technologijowe zawody tworja slědźenju blisku wokolinu z wysokim tworjenjom hódnotow a mnohostronskimi kooperaciskimi móžnosćemi. Nimo toho skići sakska slědźenska krajina wusahowacu ekspertizu a wusku narodnu kaž tež europsku syć – idealne wuměnjenja za wulkoslědźenske projekty kaž Einsteinowy teleskop.
prof. Andreas RietbrockŁužiski granit skići wurjadnu stabilitu a homogenitu. To su idealne wuměnjenja za podzemski obserwatorij, kajkež je jenož zrědka na swěće namakaš. Hromadźe z eksistowacej slědźenskej infrastrukturu a wupokazanej ekspertizu na stejnišću nastanje wědomostnje poćežomny cyłkowny paket.
prof.ka Ursula M. StaudingerTechniska uniwersita Drježdźany jako ekscelentna uniwersita skići runje te interdisciplinarne kompetency na wurjadnym niwowje, kotrež Einsteinowy teleskop trjeba – wot wysokowukonoweho ličenja přez wot KI podpěraneje datoweje analyzy hač k optoelektronice a preciznostnej měrjenskej technice. Z našim mjezynarodnym masterskim studijnym předmjetom “Astrophysics and Technological Methods” tworimy nimo toho zakład za to, za tute slědźenske polo swětadaloko talenty dobyć a dalewuwiwać.
Frank BösenbergSakske hospodarske stejnišćo je wuběrnje nastajene. Hižo dźensa je Sakska najwjetši cluster mikroelektroniki w Europje. Aktualnje inwestuje so něhdźe 16 miliardow eurow do nowych połwodźakowych zawodow. To pokazuje: Móžemy kompleksne wulkoprojekty wuspěšnje zwoprawdźić a smy sylni we wobchadźe z wysokotechnologiju – kaž we wědomosći tak tež w industriji.
Načolni w geologiskej datowej hłubokosći
Štož Łužicu w europskim přirunanju wosebje wuznamjenja, je nimoměry husta datowa baza. Region ma:
- wjace hač 34.000 dokumentowanych starotočenjow
- něhdźe 194.000 geofyzikaliskich měrjenskich dypkow
- něhdźe 970 kartěrowanych geologiskich wotewrjenjow
- systematisce digitalizowanu podspódkowu dokumentaciju z wjacorych lětdźesatkow
We wobłuku sakskeje surowiznoweje strategije buchu tute daty systematisce zběrane, archiwowane a digitalizowane. Z tym słuša Łužica dźensa k najlěpje geologisce charakterizowanym regionam Europy.